O 29 de setembro de 2021, na sala do Cineclube Padre Feijóo ('que gran apelido!), as 19:30 horas, o Ourense Film Festival, na súa XXVI edición, estreará, con película de 16 mm, as dúas últimas producións de IB Cinema: "Polavision, un fallo instántaneo", fita escrita e dirixida por Álex López, e "Non hai futuro (Opus V)", escrita e dirixida por Ignacio Benedeti. A sesión repetirase ao día seguinte, na mesma localización, pero en horario nocturno, as dez da noite.
 |
| Cartaz: Andrea Dominguez |
POLAVISION: UN FALLO INSTANTÁNEO.
A película de cinema de revelado instantáneo foi un dos logros tecnolóxicos mais importantes do século XX. O documental "Polavision: un fallo instantáneo" describe o proceso Polaroid para Súper-8, con certas secuencias rodadas neste raro sistema de cor aditivo por primeira vez no século XXI. Filmado totalmente en Polavision e Súper-8, o positivo de exhibición é en 16 mm.
No documental de 22 minutos "Polavision: un fallo instantáneo", Álex López non só describe a historia deste sorprendente procedemento cinematográfico, con entrevistas a responsables do seu desenvolvemento en Estados Unidos, Austria e Inglaterra, senón que, inauditamente, certas secuencias están filmadas co propio sistema de cinema de Polaroid 'por primeira vez no século XXI!
E desde onde se conseguiu este logro? Talvez, en Cambridge, Massachussetts, sede da Polaroid? Talvez en Viena, sede de Eumig? Non!!!: Álex realizou o seu documental neste final do Imperio Romano en que se atopa IB Cinema, na Coruña, un santuario de imaxinación entre unha refinería, unha fábrica de gas e un vertedoiro.
Un dos puntais do documental é o seu locución, do gran Santiago Fernández, "a voz de Galicia": nada sería igual sen o seu admirado timbre.
Máis información sobre "Polavision: un fallo instantáneo", en español, no seguinte vínculo: POLAVISION
NON HAI FUTURO (OPUS V)
O Opus V é a última entrega, e final, dunha "pentaloxía" fílmica sobre a crise económica española, cos seus protagonistas vinculados ao mundo do cinema e relacionados entre sí: todos eles morren, ou desaparecen, fóra de Antonio Bermúdez, o protagonista do Opus V da serie.
O Opus V é, en realidade, un documental camuflado. A través do protagonista, Antonio Bermúdez, alter ego do operador Marcos Fernández Eimil, reflicte os estertores, os momentos finais, da distribución e exhibición do cinema en 35 mm en Galicia, con imaxes que, aínda que recentes, son xa historia: o último almacén cinematográfico de Coruña, o último transportista especializado en películas, e ata a filmación das proxeccións cinematográficas , usando 35 mm, 16 e super oito mm , que foron o último acto co que, en decembro de 2018, cerrou para sempre o Museo MACUF da Coruña.
Este Opus V está contado con tres voces, a do protagonista, Marcos, en primeira persoa, un narrador "intradiexético", amolado, e ata resentido, contra a dixitalización que acabou co seu mundo.
Outro narrador, en segunda persoa, "autodiexético", coa voz de Fernando Pujalte, irmán da gran María Pujalte, dálle a razón en todo a Marcos.
Por último, un narrador en terceira persoa, "extradiexético", omnisciente, impersonal e imparcial, que o sabe todo sobre a técnica cinematográfica, coa voz de Alex, unha voz que foi todo un descubrimento.
Este documental dramatizado, como todos os da serie "Non hai futuro", está narrado en clave de comedia… ´pero para a xente que nos gusta o cinema!, o de verdade, o fotoquímico, con película. Os do mundo dixital, talvez o atoparán un pouco "faltón". Nada mais lonxe da nosa intención ofender a ninguén: simplemente, o espectador ten que imbuírse na psiquis do protagonista, Antonio, cuxo mundo, o do cinema en película, fílmico, acábase.
A película foi rodada integramente en Súper-8, montada a man, cortando e pegando a película, e sonorizada cun magnetófono e proxector Eumig, e o positivo de exhibición é en 16 mm.
OURENSE FILM FESTIVAL
Sección Panorama de Galicia
Proxeccións no Cineclube Padre Feijóo
Mércores, 29, 19:30 horas
Xoves, 30, 22:00 horas
 |
| A produtora executiva Nena Pulido, coa Eumig Nautica de 24 f.p.s. |
No hay comentarios:
Publicar un comentario